Facebook
Twitter
Youtube
App Móvil

La sociedá magdaleniense

Les escavaciones arqueolóxiques revelaron una intensa ya importante ocupación de la cueva mientres el períodu Magdaleniense.

Los cazadores-recoyedores magdalenienses son el creadores d´una de les fases culturales más riques del Paleolíticu Superior européu. En comparanza con dómines anteriores, la variedá tipolóxica de los sos preseos aumenta: azagayes, arpones, espátules, varielles... son oxetos de la vida cotidiana qu´amuesen una riqueza cultural enorme.

Los restos de fauna atopaos nos xacimientos arqueolóxicos fálennos de la caza como una de les actividaes básiques d´estos pueblos. A esto axúntase la actividá evidente de recoyida y pesca como indiquen los arpones magníficos atopaos en la Cueva d’El Pozu’l Ramu. De fechu estos instrumentos emplegárolos los especialistes como indicador cronolóxicu y cultural.

Amás d´esti tipu de ferramientes, mientres el magdaleniense siguen fabricándose dellos preseos específicos y de llarga tradición paleolítica pa la confección de la vestimienta, como los raspadores o los punzones, siendo les aguyes de güesu la novedá nesi momentu.

Pero onde más sospriende la capacidá creativa de los grupos magdalenienses nun ye nes ferramientes, iguaes con gran maestría, sinón na so decoración, na fabricación d´adornos y l´execución d´oxetos decoraos con una funcionalidá desconocía. De les escavaciones realizaes na década de 1970 en la Cueva destaca la escultura de bultu redondu d´una cabeza de cabra, executada en cuernu de venáu.

En 2001, nel cursu de los trabayos desenvueltos pol equipu empobináu por Rodrigo de Balbín, nun poyal pequeñu de la galería a unos cuatro metros d´altor sobre´l suelu actual de la cueva y frente a la representación de la mano, alcontráronse cuatro contornos recortaos con forma de cabeza de caballu sobre güesos hioides d´esti mesmu animal. Trátase de la única amuesa d´arte mueble documentada llueñe de la zona d´hábitat.

Esti tipu d´oxetos son pieces bien característiques del Magdaleniense Mediu y fueron documentadas en xacimientos pirenaicos franceses (Isturitz, Enlène, Mas d´Azil) y cantábricos (La Viña, Les Caldes, La Garma). Güesos o plaquetes de piedra decoraes con grabaos zoomorfos tamién formen parte del ricu elencu de pieces destacaes.